بعمل صيانة للبلوج واحتمال ميرجعش تاني

Sunday, April 08, 2007

شم نسيم سعيد على مصر


.
يا ملَوّنين البيض في شم النسيـــــم
.
لُون الحنين و الشوق و خمر النديم
.
ما تعرفوش سايق عليكو النبــــــي
.
تلوّنوا الأيام بلون النعيــــــــــــــم ؟
.
عجبي!!ا

Thursday, March 29, 2007

الناجح يرفع إيده

يا كل مصر ... يا ناااااس
أنا نجحت .. و الله نجحت
و حياة ماما الغالية نجحت هههههه
مبرووك يا بنات
بس أنا عايزة تعويض عالطريقة إللي صحيت بيها النهاردة
حد يصحي حد على نتيجته ههههه
مبروك تاني مرة
و عقبال مادة السموم إللي لسة مظهرتش
و عقبال البكالوريوووس
و يجعله عامر

Monday, March 26, 2007

أنا... مش حد تاني



.
يا نااااس


أقر أنا صاحبة المدونة دي


إن الكلام ده انا إللي كتبته مش حد تاني


و مش نقلاه من حد ، دي حاجة كنت كتبتها من بنات أفكاري


.


.


نقول تاني ؟!!ا


الكلام ده كنت كتبته و بعته يوم 1 أغسطس 2004 لجروب كنت مشتركة فيه (والرسالة موجودة في أرشيف المجموعة لغاية دلوقت)ا


و رجعت افتكرتها و بعتها تاني في يوم الحب السنة دي


المشكلة إنها انتشرت على النت


و بتتفرود طبعاً و في ناس كتير بتكسل تكتب حتى انها منقولة ، ويمضوا في آخر الميل باسمهم (قال يعني)و ابعت يا معلم الميل محدش واخد باله
:S
.
.
الحب هو !!!!ا

الحب حاجة زي الكيميا.. حاجة كدة بتحصل متعرفلهاش تفسير
الحب هو إنك تحب إنسان معين لذاته مش لأي حاجة تانية
هو إنك تشوف حبيبك أجمل واحد في الدنيا.. أحلى من كل البشر
الحب هو إنك تخاف عليه
الحب هو إن هو يخاف عليك أكتر ما بتخاف على نفسك
الحب هو إنه يوحشك و هو جنبك
هو إن حبيبك يبقى مالي عينيك
هو إنك تحافظ على كرامة اللي بتحبه وتحط صورته دايما أصاد عينيك
.
الحب هو إنك تبقى عايز تتغير و تكون أحسن عشانه هو..
لما تبقى ضحكة حبيبك و سعادته عندك أهم من أي حاجة تانية
الحب هو مكالمة تلفون تجيلك في عز مانت مشغول و متضايق و تنسيك تعب الدنيا
الحب هو حد بيقولك كل سنة وانت طيب ليلة عيد ميلادك
هو لما تحس انك قادر تواجه اي مشكلة مادام الشخص ده واقف جنبك
الحب لما تبقى عايز تشوف حبيبك احسن واحد في الدنيا
.
الحب لما حبيبك ياخد بايدك و يقربك من ربنا
الحب لما تحس بالامان وانك ماسك الدنيا كلها بايدك
الحب لما تدي للي بتحبه من غير ما يسال
الحب هو انك تغفر لحبيبك
هو انك تسامح
الحب لما تفهم حبيبك من نظرة عينيه.. الحب هو انك تقابل توأم روحك
الحب لما تحس بحبيبك من غير ما يتكلم حتى وهو بعيد عنك
الحب لما متعرفش مين بيحب التاني أكتر
.
الحب لما تحب واحد بيحبك

Thursday, March 22, 2007

شوية طبطبة


.
.
زمان من زمان
كان عندي أنا موهبة
حاجة كدة...من عند ربك هبة
أخطف أنا الضحكة من وسط بحر الحزن
من وسط الألم و العجز
حتى لو كان وبا! أغلبه بفرحة صافية
لما أفتكر ضحكة صبا
أصل الحنان كان كثير... ...كان عندنا حبة دفا
شوية طبطبة راحوا...حلت مكانهم قسوة
راحت الأحضان..ماتت قلوب طيبه
أكل العناد بقايا الحنان في القلوب
عدمه...عمل عليه مأدبة!
رجيت الفرح يفضل..يقاوم..لكن أبى!
و الحب امبارح كانت جنازته
قتلوه ؛و عملوا عليه مندبة!!
حتى نور الأمل؛ داب و اختفى.. ...مات و انطفى
زي ضوء الشمعة الضعيف..خبا!
يا خسارة معاني حنونة... ..كانت بين ايدينا ف يوم
صبحت بعيدة أوي.. ..و مش قريبة!!
.
.
نهى نجدي

Wednesday, March 21, 2007

ماما

إلي أطيب قلب على وجه الأرض
إلى معنى الرقة و الحنية
أغفري لي قسوتي بعض الأحيان
أغفري لي عنادي و جحودي في الأحيان الأخرى
وأغفري لي اختزال حبك في بعض الكلمات البسيطة
بك أصبحت ما أنا عليه
شكراً لك :)

Monday, March 19, 2007

يا ترى وصلك المعنى؟؟


Saturday, March 10, 2007

الأقصر - أسوان ... كلاكيت تاني مرة :)

.
i will NEVER EVER 4get it
.
.
أول حاجة عملتها لما وصلت معبد فيلة أني بحثت عن مقياس النيل حتى وجدته
ليصدمني العسكري ذو الابتسامة العريضة ( أنه مقفوول بحديد من شهرين بس) و
ضاع علينا رؤية أجمل منظر في معبد فيلة يا ولدي :( ا
.
.
وادي الملوك من فوق الجبل
.
.
سوااااان
.
.
حتشبسوووت حتشبسوووت
قفلوا عليكي يا حلوة تابووت :) ا
.
.
من معبد فيلة في أسوان
.
.
أوطتي كانت بتطل على شجر برتقال غريب الشكل
.
.
مين أطول .. أنا و لا هو ؟!! ا
.
.
جزيرة النباتات
.
.
حنا كنا هناااااااك :) ا
.

.
محمية طبيعية في أسوان
.
.
ادفو
.
.
طبعاً من هنسى مغامراتنا في عربية القطر رايح جاي
و أغنية سوهاج للمطرب الصاعد هيثم سوهاج هاهاها
خناقاتنا مع شعبان
بابا وليد المحترم بشدة
القرية النوبية (محمية طبيعية) إللي نسيت اسمها
الغنا و الرقص النوبي و الحنا و الشاي النوبي إللي محصلش
ناس أسوان إللي زي العسل .. بيبتسموا سواء ف الفندق ،
السوق ، لمطاعم ، الكورنيش أو حتى محطة القطر
بجد حسسونا إن احنا قرايبهم
و طبعاً مش هنسى حفلات الغدا اليومية و خناقاتي مع مي في الأوطة
و النوم العميق الفظيع إللي كنت بنامه في أي حتة من كتر التعب

Wednesday, February 28, 2007

القلب المكسور


.
ما الذي بقى لي بعد ما كسُر قلبي؟
توزعت أيامنا الحلوة وأصبحت ذكرى دفينة
وأصبحت الذكرى ماض مع النسيان المر
من يواسيني وأنا قد ذبحت بخنجر الحبيب
تمنيت لو غرست يداي بصدري ونزعت
قلبي من أحشائه ورميته على عرض الطريق
حين يتمزق الحب الصادق ويصبح وهم كبير
وتحبس الأنفاس وتصمت الدنيا وصوتي يجف
وتتوقف عقارب الساعة وتتغير عليك الألوان
آه آه آه يا حبي ويا قلبي ويا عشقي
أصبحت بعيد عن الناس أغلقت جميع أبوابي
حتى لا أشم رائحة الورد وأتذكر أيامي الجميلة
ولا أريد استرجاع الشريط الجميل
إنني خائف من غدر الزمان وغدرك يا خليلي
ليس لدي إلا أن أقول لك بعد كل الجراح
شكرا يا محبوبي على ما فعلته من غدر
شكرا يا محبوبي على ما تركتني عليه من الم
شكرا يا محبوبي على ما تعاملت معي وبرقه تركتني
شكرا يا محبوبي على ما أوهمتني بالحب الكاذب
شكرا يا محبوبي على ما أعشمتني بالقرب وهجرتني
محـبوبي أنت قتلت قلبي وقلبي قتلني
وداعا يا دنيتي الحلوة
وداعا يا قلبي المحطم
وداعا يا قلبي المكسور
.
.
.
منقول
كلام جميل و واقعي بس للأسف مش عارفة مين كتبه

Wednesday, February 14, 2007

عبد الموجود موجوود؟؟؟

صحيت النهاردة على شمس و جو دافي

طقس مثالي لقضاء يوم رائع

و عوضاَ عن ذلك قضيت يوم ممل جداً

لا أذكر منه سوى مذاكرة مادة السموم السخيفة

و التهامي العديد و العديد من قطع البيتزا

و تلك المكالمة المجهولة ، و الصوت المألوف جدااً

يسألني عن ابراهيم بيه عمران!!ا

Tuesday, January 30, 2007

إلى لقاء

.
أعزائي البلوجاوية
أعتزل عالمنا الرقمي الجميل
و أعود قريباً إن شاء الله
لا إله إلا الله

Friday, January 26, 2007

حدث و يحدث في كلية الصيدلة

قبل أي حاجة هتتكتب بعد كدة أحب أفدم احتراماتي لعميد كليتنا د\عمر رشوان إللي كلنا بنعتبره أب لينا في الكلية حتى من قبل ما يتعين عميد ، عشان كدة احنا صدمتنا كانت كبيرة من إللي حصل يوم الأربع
.
خير اللهم اجعله خير ، هو كان يوم أربع ( 24يناير2007 )،ميعاد آخرامتحان في الترم .. مادة(السموم)،ا
الكل بقاله فترة محبوس في بيتهم بيذاكر للمادة
أنا شخصياً كنت نايمة ليلتها ساعة و نص فقط ،بس كل يهون في سبيل السموم
الورق اتوزع و الكل ابتدى يجاوب و الحياة جميلة جداً
و فجأة (بعد مرورنص ساعة)صرخ المراقب أن اجمعوا ورق الاجابة عشان الامتحان اتلغى
طبعاً محدش عبره و كملنا اجابة بعد أن ضحكنا على (هزاره) السخيف
لكن المشكلة انه مكانش بيهزر
الامتحان فعلاً اتلغى بحجة انه اتسرب
و في خلال دقائق كان باب الكلية اتقفل بالضبة و المفتاح
و باب قسم السموم و مكتب العميد اتقفلوا هما كمان
و الطلبة بأة يقعدوا على أعصابهم يستنواالفرج
.
ثم كان الاعلان الرهيب أثناء اجتماع العميد بالطلبة في المدرج و في
حراسة الشرطة عن تأجيل امتحاني الشفوي و النظري ليوم17 فبراير
و نيجي بأة للمهم
.
صرح العميد في جريدة المصري اليوم أنه تلقى شكاوي من الطلبة قبل ساعات من الامتحان بتسرب السؤالين سبب المشكلة و بيعهم في المكتبات
أ-طيب لما انتو عارفين ان الامتحان عليه مشكلة من قبلها ،ليه بتاو الناس تذاكرو استنيتوا لما دخلنا اللجنة و جاوبلنا كام سؤال و بعدين افتكرتوا انكم عايزين تلغوا الامتحان؟؟!!!!ا
ب- مفيش حاجة اسمها ان الامتحان كان بيتباع و إلا كنا احنا عرفنا عالأقل ، و اللي حصل ان الدكتور اللي بيدرس السؤالين بتوع المشكلة متعود من سنين طويلة انه بينزل منهجه على هيئة أسئلة مقالية باجابتها للدفعة كلها في المكتبة (بعلم الكلية) و الطلبة بتجيب الأسئلة تذاكر منها (وفقاً لكلام الدكتور في المحاضرة) و النظام ده ماشي بقاله سنين
.
المعلومات اللي ذكرها برنامج البيت بيتك عن تسريب سؤالين الواحد ب 22درجة و نص و السؤال الواحد كان بيتباع ب14جنيه
أ- الكلام ده أكيد قاله واحد ساكن في هونولولو لان المشكلة كانت على سؤال واحد ب 22 درجة
ب- السؤال ده لا اتسرب و لا يحزنون بس موجود من ضمن الأسئلة اللي فيها منهج الدكتور
إللي كانت بتتباع في المكتبة (ب8جنيه) إللي هية المصدر إللي بيتباع فيه منهج كلية الصيدلة بجانب مركز الكتب في الكلية و طبيعي جداً إنه كان ييجي سؤال موجود في الملزمة لان المفروض ان الاسئلة تيجي من المنهج إللي هو عبارة عن الملزمة
.
في برنامج العاشرة مساءً لما استفسرت منى الشاذلي عن مصير الامتحان البديل (لأن جرى العرف ان يبقى فيه نموذجين امتحان عشان الحالات اللي زي دي)كانت اجابة العميد ان الامتحان البديل مكانش هيعجب الطلبة ، و ان الامتحان الطبيعي بيتكون من 20 صفحة مكانوش هيلحقوا يطبعوهم في الوقت القصير ده
أ- طبعاً العميد لما اتكلم عن الامتحان اللي مش هيعجبنا كان قصده على فكرة تم طرحها بان الدكاترة يحطوا فوراً أسئلة جديدة للامتحان و يمتحنها الطلبة و أكيد الامتحان اللي بيتكلم عليه مكانش هيعجبنا لأن كان هيتحط على هيئة أسئلة مقالية (الامتحان كله)و هو شيء يتطلب تغيير في أسلوب مذاكرة المادة من الأساس (دي مادة سموم مش حساب سنة تانية ابتدائي) و لم يتم أبداً التنويه عليه في محاضرات المادة من بداية السنة
ب- صحيح 20 صفحة ل 1600 طالب مكانش هيلحقوا يطبعوها بس لو كان فيه امتحان بديل فعلاً كان في امكان الكلية تطبعه و تمتحننا تاني يوم على طول من غير خوف إن الطلبة إللي أهاليهم عايشين برة مصر يكونوا سافروا لانهم كدة كدة كان مفروض يبقوا موجودين تاني يوم عشان امتحان الشفوي
.
صرح العميد في جريدة الأهرام يوم الخميس إنه هيراعي أن درجات الطلاب تكون متقاربة أو نفس الدرجات في الأعوام السابقة
أ - بس أنا نفسي أفهم معنى الجملة دي ، يعني إللي طول عمره بيجيب امتياز ممكن يتساوي باللي جايب مقبول و لا إيه؟
ب - بعدين ما هو الامتحان بيبقى أسئلة يا جاوبت يا مجاوبتش و بتتحط الدرجة عالأساس ده و لا هو المرة دي هيخضع للتقديرات عشان العميد يعرف يراعي
.
الخلاصة
أ- نطالب باجراء تحقيق في المهزلة إللي مش مصدقاها دي مع أسباب المشكلة و عدم تجاهل أقوال الطلبة
ب - الطلبة مرعوبة من شكل الامتحان الجاي لأنه غالباً هيبقى تعجيزي و ده من واقع إللي حصل فينا قبل كدة في ظروف مماثلة ، نطالب بامتحان عادل
ج - نطالب بالتزام د\بهية أستاذ مادة السموم بتصريحها ان الامتحان هييجي بنفس المستوى اللي كان بييجي بيه و بنفس النظام لاننا شربنا من الكلام ده قبل كدة في مادة زي الصيدلانيات مثلاً إللي شالها تلات اربع الدفعة و الباقي جاب فيها مقبول
د - واضح ان المشكلة أكبر من امتحان اتسرب ، يا ريت ترحمونا من أسافين الدكاترة و خناقاتهم إللي بتيجي على دماغ الطلبة الغلابة في الآخر ، و ركزوا شوية على :ا
.
الشرح و المناهج و أسلوب التدريس ، المدرجات الزحمة جداً و المواد إللي مش فاهمنها ، و الحاجات إللي هيتخرج أصحاب النظام القديم و هما مش دارسينها أصلاً
.
أسعار الكتب الفظيعة إللي الطلبة بيشتروها بالاجبار لو خايفين على درجة كتاب العملي و عايزين ياخدوها و غير كدة مبنستفدش منها في حاجة
.
المصاريف زادت و اتصرف كتير على دهان الكلية و المعامل و تجديدها ، بس احنا للأسف لسة محتفظين بأسلوب الأربعينات و الخمسينات في التدريس خاصة في المعامل و السكاشن ، فيه أساليب اتلغت من قاموس الصيدلة في العالم و احنا لسة بنشتغل بيها هنا خصوصاً في مواد العضوية و الصيدلانيات و الفارما
,و غير كدة لازم قبل كل امتحان عملي نعمل رحلة جميلة لمحال الأدوات الطبية عشان نشتري أدوات لزوم الامتحان ، ليه؟؟ عشان الكلية مفيش أدوات و لو حصل و كان فيها بتبقى يا مكسرة يا اما مش دقيقة
في الوقت إللي فيه ناس غيرنا في كليات تانية مبيجيبوش حاجة من بيتهم و كله موجود في الكلية
.
انسوا ولاد الدكاترة و الوسايط و درجات الشفوي إللي بتبقى في الأوكي
.
الدروس إللي بندفع فيها آلافات كل ترم (ما الناس لو كانت واخدة حقها في الشرح مكنوش دوروا على درس)ا
.
يا ريت الدكاترو يركزوا عالحاجات دي بدل الخناقات و الامتحانات الجميلة إللي بنشوفها
.
ه - سنة 2000 أطلق د\ميشيل حنا صرخته في مجلة تين ستاف (كان طالب في الكلية ساعتها) من الكلية و عمايلها
و انا أحب أطمنه ان مفيش حاجات كتير اتغيرت من سنة 2000 لدلوقت

Friday, January 19, 2007

sinatra 1964

There are many many crazy things


That will keep me loving you


And with your permission


May I list a few


The way you wear your hat


The way you sip your tea


The memory of all that


No they cant take that away from me


The way your smile just beams


The way you sing off key


The way you haunt my dreams


No they cant take that away from me


We may never never meet again,


on that bumpy road to love


But Ill always, always keep the memory of


The way you hold your knife


The way we danced till three


The way you changed my life


No they cant take that away from me




Monday, January 01, 2007

ص د ا م

هو بصراحة يعني الراجل مؤذي حتى ف موته


مهزأنا حتى و هو بيموت


يللا ربنا يسامحه عاللي عمله


و اجعله آخر التهزيء يا رب


و كل سنة و انتو طيبين


Friday, December 29, 2006

أضحى مبارك..سنة سعيدة

برغم أي أحداث بتحصل حوالية

.

.

يا كل مصر

كل سنة و انتي طيبة
.

Wednesday, December 27, 2006

بكره الشتا (3)ا


لا شيء يبعث على الابتسام أبداً

يا رب عدي الأيام دي على خير

كفاية موود الامتحانات إللي أنا فيه

متبقاش امتحانات و شتا يا رب

اللهم لا اعتراض

بس أنا مخنوقة

بكره طبقات و كتل الملابس إللي لابساها دي

صوابعي إللي بقى لونها أزرق و مش عارفة أدفيها أبداً

مجرد الاحساس بالبرد بيخنقني

مش عارفة أي عيد ده إللي الناس هتحتفل بيه في البرد

فكرة إننا ف فصل الشتا لوحدها كفيلة بقتل أي فرحة على وجه الأرض

يا رب عدي الأيام الجاية دي على خير

و عدي أصلاً فصل الشتا كله على خير


اللهم إني لا أسألك رد القضاء

و لكن أسألك اللطف في

Tuesday, December 19, 2006

اتجننت


.
ف وسط الزحمة و لخمة الوقت إللي مش عارفة أخلص منها دي
لاحظت إني بقيت أشخبط على أي ورقة ألأاقيها ف وشي
و الشخبطات مبتخرجش عن الأشكال الغريبة إللي شايفنها دي
قلت أصورها يمكن ف يوم من الأيام أقابل حد ليه ف السيكولوجي
و يفسرلي أنا اتجننت و لا لسة فاضللي شوية
سلاااام
و ادعووولي

Thursday, December 14, 2006

بكره الشتا (2)ا


يوم جديد ممل جداً
خميس آخر من خمسان الشتا الكتيرة السخيفة أبداً
أنه في هذا اليوم الغلس ،قررنا نحن القيام بحركة تغيير (بريء يا بيه ،مقصدش إللي ف بالك)ا
بدلاً من الاستسلام لنوبة النكد البكائية الاكتئابية الشتوية المعتادة
عملت كباية النسكافيه اللذيذة في الماج إللي بحبه
بس الجديد إني غيرت الكنبة
و غيرت التلفزيون
و غيرت المكان أصلاً
ثم تفرغت لمشاهدة 3 أفلام رعب ورا بعض
و ربما أفكر في قليل من المذاكرة
.
.
.
مش بقولكم شتا سخيف
بكره الشتاااااااااااااااااااا
.
.
لمزيد من التوضيحات ،تعالوا زورونا

Sunday, December 10, 2006

بل أننا


ليس أن الحب انتهى من عالم البشر



بل أننا اختزلناه إلى بعض العبارات



أننا حددناه ببعض الأفعال



أننا نبحث عنه و نتلمسه في كل مكان



و ننسى أو نتناسى أنه ملك أصابع القدر



تحركه إلينا حين تشاء



Saturday, December 09, 2006

heeeeeh :p

heeeeeeeeeeeeh
heeeeeeeeeeeeeh

heeeeeeeeeeh :-D

Friday, December 08, 2006

بكره الشتا..عاااا

يوم شتوي بارد جدا
كم أكره هذا الفصل الرطب .. أرغمني على الاستيقاظ (متأخر جداااااااا)ا
حين أبى جسدى أن يغادر دفء الغطاء
بكره الشتااااااااا
غادرت فراشي بتثاقل و ارتديت (روب صوف) غريب الشكل ثم اتجهت إلى النافذة
اختفت الشمس و تلونت السماء بلون الكآبة
الشارع موحل ... (غرقان في شبر مية ... شوارعك يا مصر)ا
أسمع صوت والدتي من الداخل :( صباح الخير .. الدنيا مطرت و هتمطر تاني )ا
برضه بكره الشتاااااااا
فصل بارد بحق
تختفي منه كل معاني الحياة
أكره عدم مقدرتي على ممارسة هوايتي في المشي حافية
أكره أطرافي حين تتلون باللون الأزرق و أفشل في تدفئتها
أكره ملمس الصوف و طبقات الملابس أرتديها طمعاً في مزيد من الدفء
تهاجمني أعراض الاكتئاب الموسمي
أعزف عن الحياة و الانطلاق و المذاكرة و الضحك
أكره انصراف الشمس بدري بدري
أكره الشوارع الخالية من المارة
أكره ليل الشتاء الطويل جداً الممل أبداً
و أكره جداً جلوسي في هذه اللحظة أدون هذه الخاطرة لا أسمع سوى خرير المطر
.
.
يرقص جرس الباب معلناً قدوم زائر للبيت
أهرع لفتح الباب لكنها تستوقفني
الللللللله ... ما شاء الله
تبارك المبدع في خلقه
أول مرة تصادف عيني هذا النوع من النباتات



أحب تداخل اللونين الأحمر القاني و الأخضر
لطالما أحببت الألوان الصريحة المحددة
كم أنا ممتنة (للجنايني) الذي أحضرها
ا (نسيت الباب) و انشغلت عنه بتأمل هذا الجمال
اللللله عالدفاااااااااااا

.
في ذلك اليوم الشتوي البارد المطير الممل
قلبي كان محتاج للدفا
شكراً (للجنايني)ا الرائع
و شكراً جداً لهذه النبتة إللي معرفش اسمها
.

Thursday, December 07, 2006

كدة يا حسين ؟!!ا

يا لا الصاعقة الكلام ده صحيح يا حسين
إنت كان لك علاقة بالست دي؟ مانتاش قادر ترد علية طبعا ، و طول المدة دي كنت بتضحك علية كنت بتخدعني ، كنت بتتظاهر بالطيبة قدامي يا فلاتي يا ألعبان يا تعبان ياللي بتجري وراك النسوان
.
و كنت بتتحجج بالشغل ف مصر عشان تنزل تقابل عشيقتك ،عشيقتك إللي صرفت عليها مال الشركة، الشركة إللي جمعت مالها بالعرق و الدموع و الدم
.
آآه يا إبليس يا خبيث أغرب عن وجهي يا محطم قلوب العذارى و زير النساء
اتفضلي شوفي سي حسين السهتان البهتان شوفي الصورة دي عامل إيه
و لا كلمة يا فلاتي يا عجري يا نقري ، انت وسخت اسم العيلة، و عيلة العيلة اسم صلطح و ملطح و النشاشي و خليت رقبتي زي السمسمة
.
هند رستم مرة واحدة ،و مين عارف مين غيرها؟ آلاف طبعاً يافتك يا سفاح بور سعيد (يا عمي) اخرس ( طب والله) كداب في أصل وشك قبل ما تقول أي حاجة ، أنا هفتش اوطتك ، أنا هفضح سرك،..
سيبوني محدش يحوشني أوطته فين ، لا يا بنتي يا لهول مأساة المش عارف إيه
آه يا منافق يا جبان يا ندل
إنت ملعون بعدد نجوم السما و رمل الأرض
إنت ملعون بعدد القبور إللي اتفتحت من أيام آدم لغاية دلوقتي
.
.

كان لذيذ أوي يوسف وهبي ف الحوار ده
مش عارفة إللي إللي فكرني بيه امبارح و قعدت أفتكر ف الفيلم



Wednesday, December 06, 2006

شتا سخيف

>
.
الحمدلله معادنا النهاردة بخ يا ولاد (اتلغى يعني)ا
و برضه مشواري اتلغى (للأسف )ا
ليلة أخرى شتوية ممطرة سخيفة
ميحليهاش غير كباية النسكافيه
و الكنبة الخضراإللي بتفكرني باعلان أمريكان فيرنتشر
و فرجتي على فيلمي المفضل جداً
u've got mail
one إللي شغال دلوقت على

Tuesday, December 05, 2006

حياتي



احساس جميل إني أكون

عايشة الحياة من غير هموم

عايشة بكل ثانية فيها


أعشق أدوب ... أحلم أطير

فوق السحااااب


حياتي و أنا حرة فيها

Saturday, December 02, 2006

ليه؟!!ا


.
ليه فجأة حسيت الفرحة ف قلبي
جوايا بيرقص م الانبساط
عايزة آخد الدنيا ف حضني
.
و ليه جوايا حاجة بتطمني
إن بكرة جاي أحلى
بكرة معنى الأمل هيعرفني
و هغمض عيني على حلم جميل
و اصحى على حقيقة أجمل بكتير

لو بإيدي


.
لو بإيدي
لو بإيدي كنت رسمت دنيا جميلة
و مليتها ورد و فل و شجر
و لونت الفرحة على الشفايف
و زرعت الطيبة في كل دقة قلب
.
لو بإيدي كنت قضيت على ظلم الحراس
و محيت صليل السيوف من قانون البشر
و خفيت معنى الحزن إللي عرف عيونهم
لو بس بإيدي

Saturday, November 25, 2006

هييييه هيييه هيييه

سلام عليكم
بصوا باة الفكرة دي كان نفسي أعملها من زمان
بس اتشجعت أوي لما قريت البوست ده عند
دنانير
loooool اكتشفت إن مش أنا لوحدي إللي بدور عالحاجات دي
عشان كدة أنا حملت كل أغاني الأطفال إللي بحبها و هبعتها في البوست ده
عشان كل الناس إللي زيي
.
و على رأي دنانير :
عموما البوست عيالى و الكبار يمتنعون
و بلاش تريقه
.
.

شاركي و جورج(فيديو)
يللا بينا (عفاف راضي)ا
رحلة عنابة
أغنية عندي بيت(افتح يا سمسم)ا
خماسي
حكايات عالمية (فيديو المقدمة بصوت أصالة و هي طفلة )ا
حكايات عالمية (فيديو النهاية-أصالة برضه)
بطة أنتيكة
بوبو الفشار
كابامارو
دبدوبة التخينة (ناس قالولي انها بصوت هشام عباس أول ما غنى بس أنا مش مقتنعة )ا
أوبريت أبريق الشاي
افتح يا سمسم أبوابك نحن الأطفال
فطوطة(المقدمة)ا
فطوطة (النهاية)ا
الفراشة (نيللي)ا
جدو علي (محمد ثروت)
جريندايزر
هم النم (عفاف راضي)ا
جازورا
كونان
لحن الحياة
ليدي ليدي
طيري يا عصفورة(ماجدة الرومي-دي فالومبيللا العربي ماشي؟)ا
برنامج المناهل (المقدمة)ا
المناهل (النهاية)ا
فالومبيللا الأصلية (نادينا)ا
رعد العملاق
حبيبة بابا...رشا(محمد ثروت)ا
بيل و سباستيان(ملقتلوش غير الفيديو اليتيم ده)ا
سالي
سالي (فيديو المقدمة)ا
السنافر
السنافر -2 (فاكرين شرشبيل؟)ا
سانشيرو
سندباد المغترب
أوبريت أبريق الشاي(فيديو)ا
سوسة (عفاف راضي)ا
بابا حبيبي ماما حبيبتي (لبلبة)ا
رعد العملاق (ده بأة فيديو الكارتون الياباني من غير دبلجة)ا
مغامرات زينة و نحول
مغامرات زينة و نحول (فيديو المقدمة)ا
.
يااااااه ،كانت أيام
:S طبعاً ملاحظين التأثر بالكارتون المدبلج،بس معلش بأة ظروف البيئة كانت كدة أيامها
;-) download يللا عيشوا

Friday, November 24, 2006

احنا

النهاردة كنت ف قاعدة مزاج كدة بسمع منير
و جبت كل صورنا .....كلها كلها
و قعدت أشوفهم واحدة واحدة
فرحت بيهم أوي
و ضحكت ... ضحكت من قلبي
و عيطت

افتكرت كل أيامنا الحلوة مع بعض

مش هتتعوض تاني الأيام دي

أنا اخترت كام صورة منهم و حطتهم

بصوا كدة عالصور

يا ترى كل واحدة كانت بتفكر ف إيه ساعة ما اتلقطت الصور دي

حلوة أوي الفرحة إللي بتنط من عينينا دي

يا ترى كانت الساعة كام؟ و لا كنا فين؟

و لا كان يوم إيه ؟

انا شايفة قلوب فرحانة

و عينيكم المبتسمة

بتقوللي كلام كتير

كلام مش بلغة البشر

ba7ebbena

Sunday, November 19, 2006

بيني و بينك

بيني وبينك سجر البن
وحبّ الهال
وزهر النوم
بيني وبينك تسع جبال
وعرب وصحرا
وغيبة يوم
بيني وبينك ضربة رمح
وفرس وسيف
وهجم الصبح
بيني وبينك طيرة طير
ونادوا كلُّن ع الفراق
وقطفني متل الصبيّر
صوت الغنّو بالعراق
رايح إسرقلك غابة،
واسرقلك جان
وعلق ع سجر البحر
عقود المرجان.
لو نقدك كان مدينة
وبالشام العرس
لاركب ع الفرس وجبلك
مفتاح القدس.
.
.
.
طلال حيدر

Thursday, November 16, 2006

قلب الحياة مليان حاجات و بتفرح


ف كل مرة تقفل على نفسك
و تقول هية دي المرة
مش مكلم حد و لا حد مكلمني
و تعلن الحداد
و ترفع الرايات السودا
عندك حق ما هو إللي حصل ده مش قليل
برضه حاجة تزعل بجد
.
.
.
و يمر يوم و التاني
تشتاق للناس و الكلام معاهم
تبقى مش عايز تكلمهم
وف نفس الوقت تزعل لو بعدوا عنك
تسأل نفسك :أنا بكابر ليه
شوية شوية تبدأ تقربلهم من تاني
و فجأة تعلن إنك لغيت الحداد
إنك عدت للحياة من جديد
و ترجع تتفاءل بزرقة السما
و تحس بدفا الشمس على خدك ف عز الشتا
و تنسى كنت زعلان ليه و على إيه
بس مش مهم
المهم إن نص الكباية إللي كان فاضي
أصبح دلوقت نص مليان
مليان حب و أمل و دفا
مليان ضحك و حواديت و قلب بيبتسم
مليان فرحة و فل و ياسمين
.
.
و يرجع منير يغني
مش كل شئ بيفوت في عمرنا بيجرح
قلب الحياة مليان حاجات و بتفرح
قلب الحياة جواه بنورة مسحورة
قلب الحياة مليان أحلام صغيورة
مش كل شئ بيفوت في عمرنا بيجرح
قلب الحياة مليان حاجات و بتفرح

Tuesday, November 14, 2006

ممكن

أسكن بيوت الفرح .. آه مُمْـكِن
أسكن بيوت الحزن .. لا يُمْـكِن
ومستحيل يا حزن راح تسكن
قِدِرالزمان يفهمنا .. آه .. يمكن
.
شكـِّلني بطعم الأفراح
لوِّني بلون التفاح
وبطعم المنجَه
وكمنجَه
تعزف لي ع الجرح أرتاح .. يمكن
.
مشيني على كفوف الراح
نسِّيني لو حلم وراح
واشمعنى المعنى
بيعرفني لو باتت في قلوبنا جراح .. يمكن
محمد منير

Thursday, November 09, 2006

يسر لنا كل أمر عسير

يوم آخر غلس من أيامي الغلسة الكتيرة أوي
و غلاسة اليوم ده (غير إن فيه امتحان عملي طبعاً)ا
إنه الامتحان سواريه
.
يعني أنا أعرف إن الكلية تنزلنا مع أول نور في الصبح اتعودنا
وقت الذروة و ماله
عالمغرب مفيش مانع اللهم لا اعتراض
إنما أنزل من بيتنا و الدنيا بتليل عشان أمتحن
جديدة دي
.
عموماً أنا عندي أمل نخلص قبل 9 مساءً إن شاء الله
و عموماً برضه أنا بعذر كليتنا الجميلة
الناس هناك مش عارفين يعملوا إيه و لا إيه عشان يبهدلونا أكتر من كدة
بس برضه على قلبي زي العسل
.
ربنا معاكم يا بنانيت ، أنا هدعيلكم لغاية ما تخلصوا الامتحان
و انتو كمان تدعولنا لما ندخل بعدكم
و أهم حاجة : إنكم مش هتخرجوا من غيرنا
تستنونا لغاية ما نخلص مفهوم
و شكلنا هنروح بيوتنا ف الآخر برضه عشان الوقت اتأخر
:)))))))))))))))))))
اللهم لا سهل إلا ما جعلته سهلاً ، و أنت تجعل الحزن إذا شئت سهلاً
لا إله إلا أنت سبحانك أني كنت من الظالمين
رب ارزقني فهم النبيين و حفظ المرسلين و الملائكة المقربين
اللهم اجعل السنتنا عامرة بذكرك وقلوبنا بخشيتك واسرارنا بطاعتك
انك على كل شيء قدير وحسبنا الله ونعم الوكيل
آمين آمين آمين

Monday, November 06, 2006

انتخبوا حدوتة


رشح حدوتة تكون أفضل مدونة عربية
.
.
التصويت ينتهي يوم 11 نوفمبر
يللا الحقوا
فاضل يومين
.
.
support hadouta
.
.
.

زمان

زمان أيام زمان
كان قلبي جوة مني بيبتسم
كان جوايا أحلام ميحدهاش جن و لا بشر
كنت بحلم أكبر أجيب السحاب
و أمسك نجوم السما بإيديا
و أملى الدنيا جناين ورد و شجر
و أعيش أشم الفل و الياسمين
.
.
لكن ده كان زمان أيام زمان
أيام كانت القلوب بيضا و صافية
زي اللبن الحليب كيف طلة القمر
أيا زمن مليان قسوة و كدب
الود ألعنك لكن مانعني إنك من ربنا
بس يا زمن أحب أسألك
ليه يا ترى مش كل البشر فرحانين؟!!ا

Sunday, November 05, 2006

happy EGYPTIAN zalantine's

إمبارح كان يوم حنكليزي جامد جداً
:DDDDDDDDD
.
zalantine's قال إيه مصر بتحتفل بال
مناسبة أخرى لجعلك تشعر إنك حنكليز من النوع المتين أوي
بس الحمدلله من رحمة ربنا بعبيده إنه دايماً بييجي ف يوم أجازة فببقى ف بيتنا و أقضي اليوم أقرا في طوفان ميلات الحب إللي بتهل على إيميلي العزيز و أتفرج على أفلام هبلة كدة
:)
مفيش مانع نقعد بلليل أنا و أختي و أخويا و كل واحد عينه عالتاني مستنيه موبايله يرن و لا يقول أنا نازل بس مبيحصلش
ههههههههههههههههههه
.
عموماً ما علينا
happy EGYPTIAN zalantine's
الفاتحة لمصطفى أمين

Saturday, November 04, 2006

عم أحمد

البطل الحقيقي في هوجة مسلسلات رمضان السنة دي و تحديداً في مسلسل (حضرة المتهم أبي) كان المبدع و الرائع أبداً عم أحمد فؤاد نجم ، إللي سطر كلمات صادقة جداً لأغنية المقدمة و النهاية
و من أول مرة سمعتها فيها قلت ده كلام عم أحمد مش حد تاني
و نجح عم أحمد في جعلي أنتظر المسلسل و إعادته يومياً لمجرد الاستماع إلى كلماته باحساس مدحت صالح لدرجة أنه انتزع دموعي في كل مرة استمعت فيها إلى الأغنية بدون مبالغة
ربنا يخليك لينا و يديك طولة العمر يا عم أحمد

.

.
نارل و أنا ماشي
ع الشوك برجلية
و إنت السبب ياأبا
يا للي خليت بية
لا فرشتلي بستان
و لا حتي بر أمان
أعيش عليه انسان
و الدنيا في ايدية
و أنا لما جيت م الغيب
العدل كان كيفي
و الحق كان مطمعي
و الحب كان سيفي
دقيت علي الأبواب
لقتني في السرداب
غابة من الأنياب
مسنونة حوالية
مع الأسف يا أبا
الدنيا دي غابة
ملناش مكان فيها
يا عيني يا وعدي
ع المغرمين بعدي
و الطيبين فيها
.
.
حقك على عيني
يا ابني يا نور عيني
لجل الوفا بديني
لك عندي بعض كلام
أنا كنت وحداني
و الدنيا وخداني
عايز ونيس تاني
يصاحبني في الأحلام
غريب و أنا في بلدي
جبتك تكون سندي
انصفني يا ولدي
اصبر علي الأيام